منتدى MAX NET


 
الرئيسيةدخولالأعضاءالمجموعاتالتسجيلس .و .جبحـثالبوابةمكتبة الصوراليومية

شاطر | 
 

 قصائد للشاعر محمد الشهري ...

اذهب الى الأسفل 
كاتب الموضوعرسالة
????
زائر



مُساهمةموضوع: قصائد للشاعر محمد الشهري ...   الخميس فبراير 11, 2010 8:48 am

<<يامدلعة>>


يامدلعه لاتدعين الضيق وأنتي في سعه...
الضيق للي ما إتسع له صدر محبوبه لا ضاق...
القلب نـفسه عند متبهــذل وعند مدلعه...
الفرق في صدق المشاعر والأحاسيس الرقاق...
الله .. ياكم لي وأنا منك الوفاق أستطلعه...
والحين لا أنتي ولا قلبك ولا حتى الوفاق...
آخر حكاية حب .. وأول جرح كنت أتوقعه...
إلي برواق تحبني .. تقدر تفارقني برواق ...
إحساسك أصلا ما يناسبني وأنا ما أنـفعه...
مادام لي مبدأ .. ولك نيه تبيعين الرفاق...
الناس قالت من يبيعك وإشترى غيرك بعه...
لا تلحق اللي منك ما يستاهل أسباب اللحاق...
إخترت أموت ولا يقولون الخلايـق إمعه...
وإخترت أفارق والصدق .. ياكره كرهي للفراق...
أصبحت مثل اللي يدور للجهات الاربعه...
راح الجهات الاربعه ولا زال في نفس النطاق...
المشكله وده يفضفض .. بس كلن يصفعه...
من وين ما وجه بوجهه للأسف يلقى طراق...
الحزن يجتاحه وشكل في حياته زوبعه...
وإحساسه بإهمال الجميع يضاهي إحساس المعاق...
الظاهر إن الناس في قلب المواجع مبدعه...
والظاهر إني صرت ممن لايطيق ولا يطاق...
الحب .. من ذا اللي يقول : الحب دنيا ممتعه...
في ذمتي مايقولها لو كان مما ذقت .. ذاق...
إن شاف نفس اللي أشوف وماسمعته يسمعه...
يختار له نار الفراق .. ولا يجي جنة عناق...
العاشق اللي مامعه غير إنتفاضة مدمعه...
الله يكون بعون قلبه .. واحتراقه .. إحتراق...
إن جيت تلقى حالته حاله .. وشبه مضيعه...
أحيان يتنفس ولكن أغلب الحال .. إختناق...
إنهد حيله .. وإنجرح .. وإحتاس في هالمعمعه...
محتار مايدري على ويش الزعل والإنشقاق...
إنصب تفكيره على (ماذا وراء الأقنعه)؟؟؟...
مسكين كان آخر ضحيه للخيانه والنفاق...
ألحين .. ياضده تكون الناس .. وإلا .. يامعه...
مايعترف بالأوسطيه .. والثقه .. والإتفاق...
أرثي لحاله عندما يكتب على الرمل إصبعه...
(هذي نهاية مايسمونه.. محبه وإشتياق)...
مجنون ليلى .. يتبع أهواءه وحنا نـتـبعه...
يعني أنا وألآف غيري .. نندرج ضمن السياق...
الصدق .. لو هم الرجال .. في كلمتين .. تقلعه...
ماتمنعه أحيان كلمة (يبغض الله الطلاق)...
السالفه أكبر من إنه يمتنع .. أو تمنعه ...
مادامت الدعوه مصير إنسان مربوط بوثاق...
إن حب .. حب الله يعينه .. والحشا متولعه...
من وين ما قلبه يسوقه من ورى خشمه يساق...
الود ودك لا وصل للوضع هاذا .. تقنعه...
(مهما إستمر الحب .. يبقى آخر الحب .. إفتراق)...
أكبر غلط لو شخص متبهذل يحب مدلعه...
والأخت .. ماتقدر توسع خاطره لو يوم .. ضااااق...

&&&&&&&&&&&&&&&&&&&&&&&&&&&&&&&&



الحــــــــــــــــادث...


إفرضي اني طلعت وكنت متنرفز كثير..
ورحت من عندك مضيع في الأماكن والجهات..

بعد مااشتد الخلاف بوضعنا واصبح مثير..
قلت :أهدي والعن الشيطان واطلع في سكات..

إتجهت..وسايقن سيارتي عكس المسير..
وصار لي حادث..ومت..وخبروك :فلان مات؟

علميني..عندها بالله وش ممكن ييصير؟
لوعرفتي من عقب زعلتك..فارقت الحياة..

تلطمين خدودك..تشقين ثوبك..مايضير..
دامك تلومين نفسك بعد مافات الفوات..

ليه ماقلتي لي: إقعد والزعل ملعون خير..
ووالله ماتطلع كذا باعصاب مافيها ثبات..

ليه خليتيني أمشي حالتي حالة ضرير..
ولا يعني كان حبك ..حب انانية وذات..

وليه انا من بعد كنت الشخص الاول والاخير..
في حياتك وبسهوله صرت مثل الذكريات..

والله ان تبطين وانتي ما على شفتك غير..
اسمي المكتوب ضمن اوراق تقرير الوفاة..

تندمين العمر كله ..أو..يأنبك الضمير..
مافرقت .. مادمت ماضي ..في ملفاتك ..وفات..

بس يبقى ذنبي برقبتك ..وانا الصب الاسير..
اللي كبلني غرامك والوفا والتضحيات..

جربي الدنيا بدوني .. كيف واقعها مرير..
وكيف لا عزوك فيني وصرت قدامك ..رفات..

تدركين بوقتها معنى العبوس القمطرير..
وتشعرين انك يتيمة اهل واخوان وخوات..

وتذكريني .. تذكرين الشعر ..وانسام العبير..
والعطر .. والورد .. وألبوم الصور .. والأغنيات..

والسوالف والغنا وإهدائنا عبر الأثير..
والإضاءة الخافته..والليل وأحلى الأمنيات..

والرسايل .. والشموع اللي في مأوانا تنير..
والمجلات القديمة .. والكتب .. والملزمات..

والهدايا من قطع الماس وعطور حرير ..
والأثاث اللي خذا حمرته من لون الشفاه..

والبحر والصيف والشاليه والثوب القصير..
والشتاء واحظانك اللي غير كل المدفئات..

والإجازة والسفر والعيد والمطر الغزير..
والمقاهي .. والمطاعم .. والطرق .. والتمشيات..

وإسمي اللي مخزن بجوالك الباندا الصغير..
أجمل الإحساس .. لكن..مات ياست البنات..

ذكريات تحاصرك من كل صوب وتستثير ..
دمعتك في كل غمضة وانتباه وإلتفات..

عن حكاية حب في هالوقت منقطع النظير ..
حب يكرم عن ردى الشهوه.. وألسنة الوشاة..

حب مدري ويش بكتب عنه؟ لكنه كبير..
أكبر من احساس أصدق شاب مع أوفى فتاة..

بس .. لا تبكين .. يبقى كل ماقلته نذير..
وافتراض لكل مايمكن حدوثه لي ,, وآت

لجل ذلك فكري وش هي النهايه والمصير؟؟
كلها حفره وجمع من الملا.. عقب الصلاة

والله ماتسوى الحياة نزعل الغالين مير..
ساعة الضيق يتعكر صفو الأنفس والذوات..

ليش اجل مانستغل الوقت دام احنا بخير..
وليش مانرضي حبايبنا .. ويلتم الشتات ..

يعني لازم ننتظر؟ والواقع أيامه تطير..
واحنا ماندري نبات الليل .. ولا .. مانبات.؟؟

العشير . أصلا يحز بنفسه يزعل عشير..
الله أكبر .. كيف ماحزت بنفسك هالسوات ؟؟

يوم شفتيني طلعت ووضعي النفسي خطير..
وقتها .. اشدراك يمكن موتتي حانت وجات..

فاحرصي دايم علي.. ولا تغيظيني كثير..
واذكري دايم شعورك لا دريتي وقيل ..مات...


&&&&&&&&&&&&&&&&&&&&&&&&&&&&&&&&



قصيدة العرس

ابد ماجيت ابارك لك ولكن جيت ابا أوصيـك // على اللي ناوي(ن) تدخل بها الليلـه .معذبتـي
ترى لولا الظروف الي عطتك وحدت محاكيك // قسم بالله ماتدخل عليهـا لـو علـى رقبتـي
ولكن النصيب اقوى ولا ادري ويش اسوي فيك // نعم صارت معزبتـك ولاصـارت معزبتـي
كذا صارت لي القسمة بتحرمني لأجل تعطيـك // كذا لازم عشان تفوز انت انا اخسر بتجربتـي
تراهـا غاليـه جـدا وتكفـى والله يخلـيـك // تدللها..تدلعها..تنسـيـهـا مصـاحـبـتـي
انا من كثر مااغليها احس اني بديـت اغليـك // ولا تسـأل بايـة حـق والا وش مناسبـتـي
لانك لو بتسألنـي بتسمـع شـي مايرضيـك // لـذا ياخـوي لاتسـأل ولاتسمـع لأجوبتـي
ابيك تحطها في داخل عيونـك وبيـن ايديـك // وهي دلوعه اعتادت علـى كثـرة مداعبتـي
فداعبها شوي شوي حتـى تشتهـي طاريـك // وشاغبها الين تقـول بطـل مـن مشاغبتـي
واذا هي مالها خلقك ولاتضحـك ولا تسليـك // تحملهـا واسألهـا ياعمـري ليـه عصبتـي؟
وبالك اسمع انك يوم تضربها وهـي تشكيـك // مايحتاج اوري لك بفـن الضـرب موهبتـي
صحيح انك بتملكها ومعـاك العقـد بالتمليـك // وانا عارف حدود الله ومـن حقـك معاقبتـي
ولكن قل لها المجنون وصانـي وهـو يعنيـك // يقول انـه بينتظـرك ولـو شيـب وشيبتـي
وانا مجنونها الي مانساهـا وانـت مايمديـك // تغطي ذكرياتي فـي هواهـا ربـع تجربتـي
احس اني تماديت بكلامي والغضـب حاديـك // لوانك فـي مكانـي ماتفكـر فـي محاسبتـي
كفاك اني تركت الليله اشغالي عشـان اجيـك // دخلت القاعه برجلي ولاادري ويـش عاقبتـي
وانا ماجيت اخرب عرسـك الليلـه ولاآذيـك // اناجيتك عشان اخاطبـك واسمـع مخاطبتـي
توصى وانتبه واحـرص عليهـا والله يهنيـك // ترى كل الكلام الي طلع من ضيقـي وكبتـي
ولكن ماقدرت انـي اقولـه وانـت مايخفيـك // اخاف اني اذا قلـت تقـوم وتقطـع رقبتـي





&&&&&&&&&&&&&&&&&&&&&&&&&&&&&&&&



كل عام واحنا حبايب



صدقيني العيد نفسـه مـا تغيـر مـن سنين
فرحة أطفال وتلاقي.. لمّة أحباب وقرايـب

والأغاني والكروت وقولـة (مْـن العايديـن)
والتمام الشمل يوم العيد .. وانسـام الهبايب

والتهانـي والهدايـا وحـب روس الوالدين
والمواصل للعمام .. وللخـوال .. وللنسايـب

كل حاجه مثل ماهي بس أنا حالـف يمين
إن لا غبتي باسجّل نفسي في هالعيـد غايـب

وارجعي بالذاكرة يابنـت وأنتي تعرفين
ليه أحس العيد عقبـك جيّتـه جيّـة مصايب

ليه لا طالعت (كرت العيد) اكفكـف دمعتين
من ذكرت أعيادنا وأيام كان الوضـع طايب

اذكر إني من (مصلى العيد) وانتـي تذكريـن
كنت أسابق خطوتينـي متّجـه يمّـك وذايـب

لأجل أكون الشخص الأول لأجل مني تسمعيـن
في صباح العيد .. جملة (كل عام إحنا حبايب)

لأجل نكتب خلف (كرت العيد) ذيـك الكلمتين
كنت اجيك بقلب طفل وطيش شاب وثقل شايب

كنت أنا أعايد وحالي حـال باقـي العاشقين
وما معاي إلا خفوقي وذي عيوني لك وهايب

وإنتي في أجمل ثيابك كاشخه والزيـن زين
تثبتين إنك عجيبة غيـر عـن كـل العجايـب

فرحة العيد .. بلقانا كانـت أصـلاً فرحتــين
مثل ضحكات الورود ومثل زخّات السحايـب

ما ليوم العيد طعم وما لهـا الذكـرى حنين
وكل منّا في مكان وكل واحـد لـه طلايب

الرجا في عيد الأضحى يمكن انـك ترجعيـن
ما أقول إلا عسى الله يجزي من كان السبايـب

وإن رجعتي وشفتيَ إني فـي عـداد الميّتيـن
ذا أنا بوصيك حاجة قبـل تنحـط النصايـب

طالبك في كل عيدٍ .. بعـد موتـي .. تكتبيـن
خلف كرت العيد جملة (كل عام إحنا حبايب)




&&&&&&&&&&&&&&&&&&&&&&&&&&&&&&&&


علـــى الموعــــــد بلهفــــه جيـت لا مانــــع ولا تأخيـــر



على الموعد بلهفـه جيـت لا مانـع ولا تأخيـر
لفيت من العصر هايم مع ان الموعـد المغـرب

وجتني بس انا مدري شعرت الجيّة هـذي غيـر
وهي تقرب من عيوني شعرت ان الممات اقرب

وقلت الله يهوّنها عسى فـي جيّتـك لـي خيـر
انا من شفتك أقبلتـي وانـا خايـف ومستغـرب

على كثر الحكي مـدري كأنـه خانهـا التعبيـر
وقالت لي جمل وأشيـاء لا تكتـب ولا تعـرب

هدَت فجأه.. تطالعني وأنا فـي حاجـة التفسيـر
لجل نحكي بهدوء اكثر سألت: الحلوة وش تشرب

فصاحت بي انا احبك ولك في هالحشـا تقديـر
وتدري ان المثل فينا وفـي احساسنـا يُضـرب

صحيح انّك وفي وانّك بري من تهمـة التقصيـر
ولكن ذي عوايدهـم مـن ايـام وزمـن يثـرب

تكون البنت لابن العم ورغبـات الكبـار تصيـر
وتدري الاقربون اولى .. مع انك للخفوق أقرب

وتدري للقـدر كلمـة.. لعـادات الأهـل تأثيـر
لذا أرجوك تتركني وانـا مـن دنيتـك باهـرب

شعرت بحكيها كنّـه قصـاص وامـر بالتعزيـر
شعرت الدنيا ضاقت بي من المشرق ليا المغرب

مشت خلّت وراها طفل ما يـدرك وش التدبيـر
يحسب ان الغرام اشعار شاعر واغنيـة مطـرب

ضحكت وماقدرت اني ألاقي لضحكتـي تبريـر
من اللي بوقتنا مرّه ضحك مـن لدغـة العقـرب

رفضت أستوعب اللي صار ولا استسلمت للتغيير
ثمان سنين اجي نفس المكـان بحـزة المغـرب

برغم ان الثمان سنيـن جـرح وكلّفتنـي كثيـر
أنا لليوم اجي وادعي.. تجي يارب .. تجي يارب


&&&&&&&&&&&&&&&&&&&&&&&&&&&&&&&&
الرجوع الى أعلى الصفحة اذهب الى الأسفل
 
قصائد للشاعر محمد الشهري ...
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى MAX NET :: القسم الأدبي :: شعر-
انتقل الى: